Saturday, March 6

कोरोनाविरुद्धको चिनियाँ खोप यसै वर्ष आउने दाबी

July 24, 2020 417

बेइजिङ — कोरोना भाइरस (कोभिड–१९) विरुद्ध चीनले निर्माण गरिरहेको एउटा खोप यसै वर्षको अन्त्यसम्ममा मानिसमा प्रयोगका लागि उपलब्ध हुने दाबी गरिएको छ । चाइना नेसनल फर्मास्युटिक ग्रुपले उक्त खोपका अन्तिम चरणको परीक्षण आगामी तीन महिनाभित्र सम्पन्न हुने आशा व्यक्त गरेको छ ।

ब्राजिलको साओ पाउलोस्थित एक स्वयंसेवकलाई परीक्षणका लागि चिनियाँ खोप दिइँदै । तस्बिर : रोयटर्स

उक्त परीक्षण सफल भएको खण्डमा कोभिड–१९ विरुद्धको खोप अपेक्षित समयभन्दा अघि नै तयार हुने चिनियाँ सरकारी सञ्चारमाध्यमले जनाएको छ ।

कोभिड–१९ को महामारी फैलिएसँगै चीन खोप निर्माणमा निकै क्रियाशील भएको थियो । तर भाइरसको संक्रमण निकै कम भएका कारण चीलने खोप तयार भइसक्न केही विलम्ब हुने गतमहिना जनाएको थियो ।

‘सिनोफार्मले कोरोनाविरुद्धको खोपको देशभित्र गत अप्रिलमा गरेको पहिलो र दोस्रो चरणको परीक्षण सफल भएको छ । यसको तेस्रो चरणको परीक्षण हाल विदेशमा भइरहेको छ,’ सिनोफार्मका अध्यक्ष लिउ जिग्जेनलाई उद्धृत गर्दै ग्लोबल टाइम्सले जनाएको छ । विश्वमा हाल तेस्रो चरणको परीक्षणमा रहेका कोभिड–१९ विरुद्धका तीन खोपमध्ये यो एक हो ।

चिनियाँ सञ्चारमाध्यमका अनुसार हाल कम्पनीले पनि उस्तै विधि अपनाएर ब्राजिलमा अर्को एक परीक्षण गरिरहेको छ । उक्त खोपको नाम ‘सिनोभ्याक’ दिइएको छ । सिनोभ्याक बायोटेक कम्पनीले निर्माण गरेका खोप आगामी तीन महिनाभित्र ब्राजिलका करिब ९ हजार स्वास्थ्यकर्मीलाई दुई चरणमा दिइने जनाइएको छ । ‘हामी विल्कुल फरक र ऐतिहासिक समयमा छौं । त्यसैले म यो परीक्षणको एक अंश बन्न चाहेकी हुँ,’ ब्राजिलको साओ पाउलोस्थित एक २७ वर्षीया चिकित्सकले भनिन् ।

साओ पाउलोका गभर्नर जोआयो डोरियाले उक्त खोपको अन्तिम नतिजा ३ महिनाभित्र आइसक्ने बताए । उक्त खोप सुरक्षित र प्रभावकारी रहेको प्रमाणित भएको खण्डमा कम्पनीलाई १२ करोड डोज खोप निर्माणका लागि अनुमति दिइसकिएको अधिकारीले जनाएका छन् ।

विश्व स्वास्थ्य संगठन (डब्लूएचओ) ले खोप विकासका कुरालाई सावधानीपूर्वक निरीक्षण गर्दै आएको जनाएको छ । विश्वका विभिन्न देशका अनुसन्धाताहरू कोभिड–१९ विरुद्धको खोप निर्माणका लागि क्रियाशील भइरहेका भए पनि सन् २०२० को अत्यसम्म खोप विकसित हुनेमा शंका व्यक्त गरेको थियो । संगठनका एक अधिकारीले बुधबार खोप विकासको दिशामा अर्को वर्षको आरम्भतिर उपलब्धि हासिल हुन सक्ने आशा व्यक्त गरेका थिए ।

बेलायतको अक्सफोर्ड विश्वविद्यालयले यसै साता खोप विकासमा ठूलो सफलता हासिल गरेको समाचार सार्वजनिक भएको थियो । विश्वविद्यालयले विकसित गरेको एउटा खोपले सुरक्षित र रोग प्रतिरोधात्मक क्षमता सक्रिय तुल्याउन सफल भएको अधिकारीहरूले दाबी गरेका थिए । उक्त खोपको परीक्षणका क्रममा १ हजार ७७ जना सहभागी भएका थिए । अनुसन्धानकर्ताहरूको दाबीअनुसार उक्त खोप लगाएकाहरूको शरीरले कोभिड–१९ विरुद्ध लड्न सक्ने एन्टिबडी र टी–सेल निर्माण गर्न सफल भएको थियो ।

विश्वव्यापी महामारीका रूपमा फैलिएको कोभिड–१९ का कारण विश्वभर हालसम्म १ करोड ५३ लाख प्रभावित भइसकेका छन् । जोन्स हप्किन्स विश्वविद्यालयका अनुसार भाइरसको संक्रमणका कारण बिहीबार साँझसम्म ६ लाख २४ हजार ३ सयभन्दा बढीको ज्यान गइसकेको छ । भाइरसका कारण सबैभन्दा बढी प्रभावित अमेरिकामा संक्रमितको संख्या ३९ लाख ७३ हजार नाघिसकेको छ । १ लाख ४३ हजार २ सयभन्दा बढीले ज्यान गुमाइसकेका छन् ।

दोस्रो प्रभावित ब्राजिलमा संक्रमितको संख्या २२ लाख २७ हजार ५ सय छ । ब्राजिलमा भाइरसको संक्रमणका कारण मृत्यु हुने ८२ हजार ७ सय ८१ छ ।

कोभिड–१९ का कारण प्रभावित राष्ट्रहरूको सूचीमा भारत तस्रो स्थानमा छ । भारतको स्वास्थ्य तथा परिवार कल्याण मन्त्रालयका अनुसार बिहीबार साँझसम्म १२ लाख ३८ हजारर ७ सय ९८ जना भारतीयमा संक्रमण पुष्टि भइसकेको छ । भाइरसका कारण भारतमा ज्यान गुमाउनेको संख्या २९ हजार ८ सय ६१ पुगेको छ ।

प्रतिकृया दिनुहोस्