Thursday, May 28

जसले दैनिक खुवाइरहेछन् अलपत्र यात्रुलाई निःशुल्क खाना, यी दम्पती प्रचारमा आउन चाहेका थिएनन्

April 17, 2020 741

काठमाडौं। यो कोरोना महामारीबीच हामीले व्यापारीले भएका सामानसमेत लुकाएर कालोबजारी गरेको समाचार पनि सुन्यौं। विपत्ति परेका बेला एकले अर्काेलाई सहयोग गर्नु त परै जाओस् यही हो मौका भन्दै सकेसम्म फाइदा लिने र ठग्ने मानव प्रवृत्ति छ। यस्तो बेला कसैले कसैलाई निःस्वार्थ मनले सहयोग गर्लान् भनेर कल्पना गर्न कठिन छ। तर सर्लाहीको हरिवन नगरपालिका वडा नम्बर ९, सुखेपोखरीमा फरक दृश्य देखिएको छ। पूर्वपश्चिम राजमार्गसँग जोडिएको मैनाली परिवारको एउटा घरमा लकडाउनका कारण बेखर्ची बनेका यात्रुलाई सित्तैमा दैनिक भोजन गराउने गरिएको हो।

वडाध्यक्ष सीताराम पोखरेलका अनुसार स्थानीय अर्जुन मैनालीको दम्पतीले काठमाडौंलगायत विभिन्न स्थानबाट पैदले आफ्ना गन्तव्यतर्फ गइरहेका यात्रुलाई निःशुल्क खाना खुवाउने गरेका हुन्। ‘मैनाली र उनकी पत्नी अम्बिका उप्रेती मिलेर बेखर्ची बनेर बाटामा हिँडिरहेका यात्रुलाई दैनिक खाना पकाई खुवाइरहेका छन्,’ वडाध्यक्ष पोखरेलले जानकारी दिँदै भने, ‘अहिलेको यो स्वार्थी जमानामा पनि उनीहरूको उपकार देखेर म चकित छु।’ उनका अनुसार लकडाउन लागूभएयतोखि नै मैनाली दम्पतीले त्यसरी बेखर्ची बनेका यात्रुलाई खाना खुवाइरहेका छन्।

खाना पनि बासमती चामलको खुवाइरहेका छन्,’ वडाध्यक्ष पोखरेलले भने, ‘आज आफैं गएर हेरेर आएँ र फोटो खिचें।’ उनका अनुसार आफूले तिस्बर लिन खोज्दासमेत मैनाली दम्पतीले आफूहरू प्रचारमा आउन नचाहने भन्दै मानेका थिएनन्। तर पछि सम्झाइबुझाइ गरेपछि मात्रै तस्बिर खिच्न दिएको वडाध्यक्ष पोखरेलले बताए। वडाध्यक्ष पोखरेलले उनीहरूको त्यो तस्बिर आफ्नो फेसबुकमा सेयर गरेका छन्। र, लेखेका छन्, ‘यी हेर्नुहोस् त! २५ दिनदेखि यी दुईले कोरोनाको लकडाउन भएर आफ्नो घरतर्फ फर्केका बेखर्ची यात्रुलाई मसिनो चामलको भात, दाल, तरकारी, अचारसहित प्रेमपूर्वक भोजन गराएर मानव सेवा गरिरहेका छन्।’

पोखरेलले अगाडि लेखेका छन्, ‘यी समाज सेवकहरूलाई न आफ्नो विज्ञापन चाहिएको छ, न फेसबुकमा छाउनु पेरेको छ। मात्र मानव धर्मको भावना छ।’ उनीहरू जीवन अस्पतालका सञ्चालक हुन्। त्यही अस्पतालको क्यान्टिनमा खाना खुवाएर बेखर्ची यात्रुको सेवा गरिरहेको वडाध्यक्ष पाेखरेलले बताए।(नेपालखबर)

सेल्फ क्वारेन्टाइनमा बस्दा पालना गर्नुपर्ने १५ नियम

१. म पर्याप्त भेन्टिलेसन भएको कोठामा एक्लै बस्नेछु र यो सम्भव नभएमा छुट्टै ओछ्यानमा सुतिरहेको अर्को व्यक्तिसँग कम्तिमा १ मिटर दूरी राख्नेछु ।

२. म छट्टै वाथरूम र शौचालयको प्रयोग गर्नेछु र यदि यो सम्भव नभएमा प्रयोग गरेपछि बाथरूम र शौचालय आफै सफा गर्नेछु ।

३. म आफू बस्ने कोठा आफै सफा गर्नेछु ।

४. म घरभित्र साझा रूपमा प्रयोग हुने ठाउँहरू जस्तै भान्सा, शौचालयमा मेरो आवातजावतलाई सीमित गर्नेछु । यी साझा ठाउँहरूमा पर्याप्त भेन्टिलेसन भएको वा झ्याल खुला रहने सुनिश्चित गर्नेछु ।

५. म स्वास्थ्य संस्था जान बाहेक अन्य कामको लागि घर बाहिर जाँदिन । म काममा, विद्यालयमा वा सार्वजनिक क्षेत्रहरूमा जाँदिन र सार्वजनिक यातायातको प्रयोग गर्दिन ।

६. म नियमित रूपमा आफ्नो हात साबुन र पानीले मिची मिची २) सेकेन्डसम्म धुनेछु वा हात सफा राख्न अल्कोहलयुक्त हेन्ड सेनिटाइजर प्रयोग गर्नेछु । म हात नधोइ मेरा आँखा, नाक र मुख छुनबाट जोगिनेछु ।

७ मैले प्रयोग गर्ने गिलास,कप, खाना खान प्रयोग हुने भाडा, तौलीया रुमाल,ओछ्यान वा अन्य सामानहरू घरका अन्य व्यक्तिहरूसँग साझा प्रयोग गर्दिन । प्रयोग गरेपछि यी सामानहरू म साबुन र पानीले सफासँग धुनेछु ।

८. म अन्य व्यक्तिहरूसंग प्रत्यक्ष सम्पर्क गर्ने छैन ।

९. यदि अन्य व्यक्तिहरूसंगको सम्पर्कमा आउनु पर्दा म कम्तिमा १ मिटर (३ फिट) को दुरी राख्नेछु र म अर्को व्यक्तिसँग एउटै कोठामा हुँदा र स्वास्थ्य संस्था जाँदा मास्क लगाउनेछु ।

१०. खोक्दा वा हाच्छिउँ गर्दा म मेरो मुख र नाकलाई टिस्यु, रुमाल र कुहिनाले छोप्नेछु ।

११. म आफ्नो कोठाबाट प्रयोग गरिएको टिस्यु, रूमाल, मास्क र अन्य चीजहरू छुट्टै फोहोर फाल्ने ठाउँमा फाल्नेछु र फालेपछि तुरून्तै कम्तिमा २० सेकेन्डसम्मका लागि आफ्नो हात साबुन र पानीले मिची मिची धुनेछु । रूमाल वा पुन प्रयोग गर्ने कपडा साबुन र पानीले सफासँग धुनेछु र यसलाई घाममा राम्ररी सुकाएपछि मात्र प्रयोग गर्नेछु ।

१२. म स्वास्थ्य तथा जनसंख्या मन्त्रालयबाट प्राप्त निर्देशनहरूको पालना गर्नेछु र आवश्यक सहयोगको लागि सधैं तयार रहनेछु ।

१३. म क्वारेन्टाइनमा रहँदा आफ्नो शरीरको तापक्रम दैनिक एक पटक जाँच्नेछु र दिइएको फाराममा रेकर्ड गर्नेछु । मलाई दिईएको निर्देशन अनुसार १४ दिनसम्म मेरो दैनिक स्वास्थ्य स्थिति बारे तोकिएको स्वास्थ्य निकायमा जानकारी दिनेछु ।

१४. कुनै पनि स्वास्थ्य समस्या देखिएको खण्डमा वा क्वारेन्टाइनमा बस्दा अन्य केही समस्याहरू भएमा तोकिएको स्वास्थ्य निकायवाट प्राप्त निर्देशनहरू अनुरूप गर्नेछु ।

१५. म स्वास्थ्य तथा जनसंख्या मन्त्रालयसंगको पूर्व अनुमति बिना क्वारेन्टाइन स्थान भन्दा बाहिर यात्रा गर्ने छैन । आवश्यक भएमा यहाँ सम्पर्क गर्न सक्नु हुनेछ ।

प्रतिकृया दिनुहोस्